dast-E-daman dua Rahe Na Rahe

Maryam Naz

dast-e-daman dua rahe na rahe

ham chale ab vafa rahe na rahe

main fana ki dagar pe huun yaaro

ab kisi ki saza rahe na rahe

aaine tum to mere saath raho

mujh men chahe ada rahe na rahe

jalna qismat men hai to jalna hai

chhat pe koi ghata rahe na rahe

paanv nange hain har tamanna ke

sar pe ab ke rida rahe na rahe

ho gai jo khata to ab ke baras

mujh men koi khata rahe na rahe

jal gai baagh ki umiden bhi

ab gulon men faza rahe na rahe

mere zakhmon ke dast-e-daman men

dard ki ab dava rahe na rahe

bujh gae diip sab vafaon ke

sahn men ab hava rahe na rahe

farq padta hai kya bhala mujh ko

us ke dil men dagha rahe na rahe

alamiye khuub ham ne jhele hain

dar nahin alamiya rahe na rahe

girya-o-gham ke aine men hain

aks men ab aza rahe na rahe

mere pahlu se aag hai lipti

sar pe bad-e-saba rahe na rahe

lab khule hain to kuchh suno pal-bhar

kyuun ke phir ye gila rahe na rahe

ab na lautenge phir kabhi ‘mariyam’

mere pichhe sada rahe na rahe