Kishwar Naheed
mujhe maghlub karne ko
mire jazbat ke andokhta hilon ko uksa kar vo kahte hain
tiri ankhon tiri banhon men
jannat ke shagufon ki mahak
asaishon ki lazzaton ka lams rachta hai
magar ab khvahishen paanv pakadti hain
nae khvabon ke jalon men ulajhte saans kahte hain
kabhi to phaile hathon ke tamavvuj men simat jaane ki targhib-o-isharat ko
guzarti saaton se mavara aise zamanon ki
faza samjho
jahan saae simat kar ek huun
taslim-e-jan tak ki humak jaage
kabhi thahro
kabhi badhti hui maujon se ham-aghosh hoti
tez lahron ki faza hone men
yak-jani ki pinhan sarkhushi dekho
kabhi us jabr-e-be-andaz ke phande se niklo
aur racho us men ki vo khud tum men rachne ke liye betab daaim hai
rachao haath men is tarah mehndi
log kah uthin
use chahat ki be-payan tapish ki hiddaten gulzar karti hain
rachao haath men is tarah mehndi
ye tapan nangi hatheli apna paikar
surkhiyon se dhanp le aise
ki dil ke tishnagi asar jazbe bhi
tazabzub ke dhundlakon se nikal kar
roz-o-shab ki naghmagi ko jazb karne par huun amada
magar rangon ko akhir
jabr-e-be-rangi ka khamyaza muqaddar hai
agar yuun apne hathon se lagai mehndiyon ke rang ud jaaen
to hasrat-zada ankhen kise chahen
kise paband-e-dar samjhen
kise dhunden
Leave a Reply