Riwayat Na Tute

Kishwar Naheed

ham rivayat ki kohna sadiyon ke parbat tale

vo ghane sabz jangal hain jo

be-panah shakh-dar-shakh tabindagi

tazgi ke tamavvuj se sanvla ke

khud hi jhulas jaaen

aise jalen aise jalen

ki faqat duur tak koela koela hi dikhai de

aur tazgi ki numu

khaak se bhi gavahi na de

vo muqaddar ke achchhe

ki jin ko jalape ki muddat guzarne pe

un koelon ki jagah hiire moti mile

vo muqaddar ke achchhe

ki jin ki duaen zamin ki tahon men vahin

to kahin sona chandi banen

vo muqaddar ke achchhe

ki jin ke badan kholte khuun ke chashme the

ab bhi hain

paare ki kanon ki surat kahin

to kahin aise bhi sakht janon ke hain silsile ja-ba-ja

jin se faulad ka naam painda hai

vo jalan jo kabhi tazgi ke tamavvuj se paida hui

hai muqaddar ki tahrir aisi ki jis ki jalan ibtida

intiha bhi jalan

jalte rahne ka ye saneha bhi jalan

anjuman anjuman

chaudhvin-rat ke chand ne bhi kaha

bhigi barsat ke raad ne bhi kaha

tum vahi ho ki jin ko chatakhne ki mohlat bhi milti nahin

ab rivayat yahi hai

nibhao hanso

muskurao jalo

har ik zard chehra gulabi karo

har ik aankh ko arghavani karo

magar yaad rakkho

rivayat na tuute

tamavvuj ki har tazgi laakh jhulse

rivayat na tuute