Poet
kya khabar thi yaar ke aate hi aafat aaegi
qamat-e-zeba men poshida qayamat aaegi
pahlu-e-viran ko apne dekh kar kahta huun main
dil na dhundhunga yahan un ki nadamat aaegi
gham nahin monis na ho koi tire bimar ka
vadi-e-ghurbat men us ke saath himmat aaegi
is tasavvur men na dekha aina us yaar ne
ban ke jan-e-mubtala mirat men hairat aaegi
marte hain be-gunah vo roz ik nashad ko
rafta rafta ek din apni bhi naubat aaegi
dushmanon ne ye samajh kar bazm se roka mujhe
dekh kar shayad mujhe un ko muravvat aaegi
meri betabi ki halat se unhen aagah kiya
haif tujh men nama-bar kab adamiyat aaegi
go gharib-e-be-vatan huun baad-e-murdan dekhna
ah-o-zari ko miri turbat pe hasrat aaegi
hai dam-e-murdan tasavvur ai but-e-zeba tira
maut aaegi to ban kar teri surat aaegi
ai ‘jamila’ is dil-e-vahshi ki halat dekh kar
qais ko farhad ko vamiq ko ibrat aaegi
Leave a Reply