Ishrat Afreen
apni aag ko zinda rakhna kitna mushkil hai
patthar biich aina rakhna kitna mushkil hai
kitna asan hai tasvir banana auron ki
khud ko pas-e-aina rakhna kitna mushkil hai
angan se dahliz talak jab rishta sadiyon ka
jogi tujh ko thahra rakhna kitna mushkil hai
dopahron ke zard kivadon ki zanjir se puchh
yadon ko avara rakhna kitna mushkil hai
chullu men ho dard ka dariya dhyan men us ke hont
yuun bhi khud ko pyasa rakhna kitna mushkil hai
tum ne maabad dekhe honge ye angan hai yahan
ek charagh bhi jalta rakhna kitna mushkil hai
daasi jaane tute-phute giton ka ye daan
samay ke charnon men la rakhna kitna mushkil hai
Leave a Reply