Tabiat In dinon Auham Ki Un Manzilon Par Hai

Humaira Rahman

tabiat in dinon auham ki un manzilon par hai

dil-e-kam-hausla kaghaz ki giili kashtiyon par hai

guzashta mausamon men bujh gae hain rang phulon ke

daricha ab bhi mera raushni ke zaviyon par hai

hazaron abnusi jangalon ka husn kya maani

hamen jab saans lena kimiyai tajrabon par hai

kada hai meri ajrak par balochi kaam shishe ka

kisi ke aks ki qaus-e-quzah sab ainon par hai

mire angan men ik nannhi gilahri ka basera hai

bahut maasum sa ik naqsh meri kyariyon par hai

main us par apne andar ki humaira vaar aati huun

magar vo be-yaqini men abhi pahli hadon par hai