Humaira Rahat
ye kahna tha jo duniya kah rahi hai
ye ganga kab se ulti bah rahi hai
khabar hai khvab tutega yaqinan
magar ik fakhta dukh sah rahi hai
lagi thi us ki buniyadon men dimak
so ab dil ki imarat dhah rahi hai
kahin ye khushk ho jaae na sathi
mire dil men jo nadiya bah rahi hai
sitara band mutthi men milega
miri taqdir mujh se kah rahi hai
mire dil ke akele ghar men ‘rahat’
udasi jaane kab se rah rahi hai
Leave a Reply