Fauziya Rabab
zulf-e-mohabbat barham barham mi raqsam
vajd men hai phir chashm-e-pur-nam mi raqsam
ishq ki dhun men ankhen naghma gaati hain
ghol mire jazbon men sargam mi raqsam
saiyan zakhm tiri hi janib takte hain
aaj laga nainon se marham mi raqsam
meri masti men sarshari teri hai
mere andar tere mausam mi raqsam
vahdat ka ik jaam pila de ankhon se
ek nazara dekhun paiham mi raqsam
aa sanval aa aise aan sama mujh men
raqsan hon do ruhen baham mi raqsam
phail gai har gaam ‘rabab’ mohabbat yuun
mi raqsam mi raqsam raqsam mi raqsam
Leave a Reply