Fauziya Rabab
mujh ko to kuchh aur dikha hai ankhon ke us paar
tum batlao akhir kya hai ankhon ke us paar
sapna koi bikhar chuka hai ankhon ke us paar
dariya jaise tuut pada hai ankhon ke us paar
likkhun tera naam padhun to sanval tera naam
tera hi bas naam likha hai ankhon ke us paar
binai tere raston ko thaam ke baithi hai
tere ghar ka dar bhi va hai ankhon ke us paar
ankhon ke is paar to jaise dariya thahar gaya
lekin sahra bikhar gaya hai ankhon ke us paar
din taabir miri chaukhat par la kar rakh dega
raat ne tera khvab buna hai ankhon ke us paar
rakh deta hai haath ankhon par ghair ko jab bhi dekhun
jaane aisa kaun chhupa hai ankhon ke us paar
us ko jaata dekh rahi hain hans hans kar ye ankhen
jaane kya kuchh biit raha hai ankhon ke us paar
ab tu aa kar dekhega to rota jaega
ham ne aisa bain kiya hai ankhon ke us paar
bas ik khvab ki mayyat hai aur matam-dari hai
ham ne ja kar dekh liya hai ankhon ke us paar
ham ne teri ankhon men rah kar mahsus kiya
kitna dard chhupa rakkha hai ankhon ke us paar
ab duniya ke chehron men tujh ko main kya dekhun
dil ne tujh ko dekh liya hai ankhon ke us paar
laakh zamana bech aae tu laakh ho mujh se duur
lekin bilkul paas khada hai ankhon ke us paar
kyon na har ik janib ab shahzade ki surat ho
ham ne us ko naqsh kiya hai ankhon ke us paar
tujh ko to abad laga karti hain ye ankhen
virani ka shahr basa hai ankhon ke us paar
ojhal ojhal rahne vaala meri ankhon se
mujh se kitni baar mila hai ankhon ke us paar
ankhon se to nikal pada hai pal bhar men lekin
aansu ka saman bacha hai ankhon ke us paar
hairani us paar se akhir kar baithi hai kuuch
vo kitna hairan khada hai ankhon ke us paar
tujh ko bhi sarshar na kar den ankhen to kahna
ek tilism-e-hosh-ruba hai ankhon ke us paar
patthar ho kar rah jaengi ankhen muund ‘rabab’
ab bhi us ka khvab pada hai ankhon ke us paar
Leave a Reply