Fatima Hasan
ankhon men na zulfon men na rukhsar men dekhen
mujh ko miri danish mire afkar men dekhen
malbus badan dekhen hain rangin qaba men
ab pairahan-e-zat ko izhar men dekhen
sau rang mazamin hain jab likhne pe aauun
gul-dasta-e-maani mire ashar men dekhen
puuri na adhuri huun na kam-tar huun na bartar
insan huun insan ke meaar men dekhen
rakkhe hain qadam main ne bhi taron ki zamin par
pichhe huun kahan aap se raftar men dekhen
mansub hain insan se jitne bhi fazael
apne hi nahin mere bhi atvar men dekhen
kab chaha ki saman-e-tijarat hamen samjhen
laae the hamen aap hi bazar men dekhen
us qadir-e-mutlaq ne banaya hai hamen bhi
taamir ki khubi usi meamar men dekhen
Leave a Reply