Farah Iqbal
dekha palat ke jab bhi to phaila ghubar tha
kuchh ansuon ki dhund thi ujda dayar tha
yadon ke aaine men hain ab bhi basi hui
ankhen ki jin men munjamid ik intizar tha
rishton ki dor haath se chhuti thi is liye
daman jo bad-gumaniyon se taar taar tha
kaisi thi mai jo aankh se tu ne pilai thi
meri ragon men aaj tak us ka khumar tha
tuuta koi sitara tha ya khvab-e-arzu
taair qafas men raat bahut be-qarar tha
dhundla diye the jis ne sabhi aine yahan
mere hi ghar se uttha vo gard-o-ghubar tha
Leave a Reply