Fahmida Riaz
isi akele pahad par tu mujhe mila tha
yahi bulandi hai vasl tera
yahi hai patthar miri vafa ka
ujaad chatyal udaas viran
magar main sadiyon se, is se lipti hui khadi huun
phati hui odhni men sansen tiri samete
hava ke vahshi bahao par ud raha hai daman
sambhala leti huun pattharon ko gale laga kar
nukile patthar
jo vaqt ke saath mere siine men itne gahre utar gae hain
ki mere jiite lahu se sab aas paas rangin ho gaya hai
magar main sadiyon se is se lipti hui khadi huun
aur ek unchi udaan vaale parind ke haath
tujh ko paigham bhejti huun
tu aa ke dekhe
to kitna khush ho
ki sang-reze tamam yaqut ban gae hain
damak rahe hain
gulab patthar se ug raha hai
tongue of stone
Leave a Reply