Erum Zehra
kitni duur se chalte chalte khvab-nagar tak aai huun
paanv men main chhale sah kar apne ghar tak aai huun
kaali raat ke sannate ko main ne pichhe chhod diya
shab-bhar taare ginte ginte dekh sahar tak aai huun
likhte likhte lafzon se meri bhi kuchh pahchan hui
saari umr ki punji le kar aaj hunar tak aai huun
shayad vo mitti se koi teri shakl bana paae
tere khadd-o-khal batane kuza-gar tak aai huun
suraj ki shiddat ne mujh ko kitna hai behal kiya
dhuup ki chadar odh ke sar pe ek shajar tak aai huun
babul ke angan se ik din har beti ko jaana hai
ankhon men nae khvab saja kar tere dar tak aai huun
apne haath men ilm ki shama ‘iram’ ne thame rakkhi hai
main to ek ujala le kar dida-var tak aai huun
Leave a Reply