Tumhaari Aankhen

Darshika Wasani

tumhari ankhen tum vahin to baste ho

ek jism ko duniya ne tumhara naam diya

tumhen paaya tumhari ankhon men hai main ne

un do palkon ne chhua hai mujhe

tumhari ungliyon ke jadui sparsh si

mere chehre ki narm gulabi galiyon men khoi

meri zulfon men uljhi hui resham se tar-ba-tar ye ankhen

kabhi honth ban kar tumhari sanson ki aahat ko

chupke se mere kanon men rakh jaati hai

tumhare zehn men panap rahe har

nazuk jazbat ki khushbu hai tumhari ankhen

mere kanpte honton pe tumhare honton ke

nishan hai tumhari ankhen

vahi to hai jo hatheliyan ban kar mazbuti se

mera haath thame hue hai ab tak

tumhare dil si dhadakti hai tumhari ankhen

mere ashkon ka har ek qatra

un ki nami men duub kar ek ho jaata hai

raat ke sannate men mazbut bahen ban kar

apni thandak men sula deti hai

tumhare qadam ban kar saath chali hai jaise tum chalte

us ne luuta nahin lautaya hai mujhe apne aap ko

in ankhon men ek ghar basaya hai main ne

tumhare jism men judi hai magar

meri hai tumhari ankhen