Bilqis Zafirul Hasan
fusun-zada hain havaen manzar tamam mashur chup pade hain
siyah nairang nim-shab ka sitare jhuk jhuk ke dekhte hain
sahar ki lau men jala rahi hai saba kanval rang-o-bu men tar hain
darakht saare sajae moti ki thaliyan saf-ba-saf khade hain
hazar raten guzar gaiin ik hamare hi gham ki shab na guzri
ujale khaif siyah-kade se badal ke rasta nikal rahe hain
dhadakte dil jaisi saaton vaale roz-o-shab ab kahan se laaen
gire hue khushk mausamon men na jaane kab ke vo kho chuke hain
is ek hi zindagi men kitne janam liye baar baar ham ne
aur ab ye roz jaan de de ke kyuun jiye baithe sochte hain
haqiqaten yuun nahin badaltin ba-khubi maalum hai hamen bhi
farar hone ko khud se kuchh khvab-zar phir bhi bana liye hain
khud apni khvahish pe jaan dene ka naam rakkha hai ishq-o-ulfat
hua havas men ye khud-farebi ke jaal kya dil-nashin bune hain
Leave a Reply