Azra Abbas
tumhare aane se pahle
kunji taale men
ghumti hai
tumhare dakhil hone ki avaz aati hai
tum dhamake-dar paanv
rakhte hue
ahista se ya kabhi tezi se
kamre men kahin kisi taraf
jaate hue
phir thodi dair tak
vahin khade rahte ho
shayad mere sakit jism ko
dekhte ho
jo tumhari harakat ki avaz par
kaan lagae pada hota hai
kabhi be-khabari men
kabhi agah
phir tum paani piite ho
ya nahin piite
thode vaqfe tak
khamoshi rahti hai
ghadi ki tik tik ke darmiyan
tumhare nivale chabane ki avaz
sunai deti hai
aur kabhi ye avaz mere jism ke
gard ghumne lagti hai
aur men be-khabar
aur kabhi agah
tumhari nivale chabane ki avaz men
shamil ho jaati huun
Leave a Reply