Ahmad Nadeem Qasmi
ejaaz hai ye teri pareshan-nazari ka
ilzam na dhar ishq pe shorida-sari ka
is vaqt mire kalba-e-gham men tira aana
bhatka hua jhonka hai nasim-e-sahari ka
tujh se tire kuche ka pata puchh raha huun
is vaqt ye aalam hai miri be-khabari ka
ye farsh tire raqs se jo guunj raha hai
hai arsh-e-moalla miri ali-nazari ka
kohre men tadapte hue ai subh ke taare
ehsan hai shair pe tiri charagari ka
Leave a Reply