Kahani Jo Adhuri Thi

Ambareen Haseeb Ambar

ye kis ne aag hote roz-o-shab men

mujh ko maan kah kar pukara hai

ki jis ki pyaar men duubi hui avaz ne

har aag ko shabnam banaya hai

ki ab rutba mujhe maan ka dilaya hai

mire bachche

main teri muntazar

shayad azal se thi

tire hi vaste shayad main jannat chhod kar

duniya men aai thi

ki ab jo tujh ko paaya hai

mire jalte badan men mamta ki chhanv utri hai

mire bachche

main ab sahra nahin

aisa shajar huun

jis ke saae men

faqat tu hi nahin

be-khvab meri zindagi bhi

bahut asudgi men kho gai hai

kahani jo adhuri thi mukammal ho gai hai