Ahmad Mushtaq
manzar-e-subh dikhane use laaya na gaya
aati jaati rahin shamen koi aaya na gaya
raat bistar pe khule chand men sota tha koi
main ne chaha ki jagaun to jagaya na gaya
ek muddat use dekha use chaha lekin
vo kabhi paas se guzra to bulaya na gaya
ghere rahti thi use ek jahan ki nazren
phir jo dekha to vo us aan men paaya na gaya
sar uthate hi kadi dhuup ki yalghar hui
do qadam bhi kisi divar ka saaya na gaya
tha muqarrar ki mulaqat rahegi us se
vo to pahuncha tha magar mujh se hi aaya na gaya
Leave a Reply