Ada Jafarey
his nahin tadap nahin bab-e-ata bhi kyuun khule
ham hain girafta-dil abhi ham se saba bhi kyuun khule
ab ye udaas din hamen saath liye liye phire
khvab bujhe to kya raha kaali ghata bhi kyuun khule
dil ka koi ziyan nahin jaan ka moamla nahin
haath men ik diya nahin mauj-e-hava bhi kyuun khule
yaan kisi rahguzar pe kuchh naqsh-e-qadam pade rahe
qasid-e-khush-khabar nahin shahr-e-saba bhi kyuun khule
umr tamam kaat di hasrat-e-kakh-o-ku liye
mere tumhare samne arz-o-sama bhi kyuun khule
kuza-ba-kuza bat gaiin jitni bhi thiin sadaqaten
khali hatheliyon pe ab harf-e-dua bhi kyuun khule
shiddat-e-raqs-e-arzu apna javaz aap thi
meri nigah par ‘ada’ meri khata bhi kyuun khule
Leave a Reply