Zafar Iqbal
ham ne avaz na di barg o nava hote hue
aur milne na gae us ka pata hote hue
aankh ke ek ishare se kiya gul us ne
jal raha tha jo diya itni hava hote hue
ek patta sa larazta huun sar-e-shakh-e-guman
apne har-su koi tufan-e-bala hote hue
chal rahe hote hain dhare kai dariya men so ham
sab men shamil bhi rahe sab se juda hote hue
vaqt par aa ke baras to gae badal lekin
der hi lag gai jangal ko hara hote hue
ham bhala dad-e-sukhan kyuun nahin chahenge ki vo
aap tarif ka talib hai khuda hote hue
kuchh hamen bhi khabar is ki na hui khaas ki ham
kya se kya hote gae asl men kya hote hue
baat ka aur bhi ho sakta hai matlab aur phir
lafz tabdil bhi hota hai ada hote hue
kya zamana hai ki is gumbad-e-be-dar men ‘zafar’
apni avaz ko dekha hai fana hote hue
Leave a Reply