Zafar Iqbal
ajab koi zor-e-bayan ho gaya huun
ruka huun to phir se ravan ho gaya huun
bahut gard udne lagi mere pichhe
akela hi main karvan ho gaya huun
sabhi mere hone pe khush ho rahe hain
mujhe bhi batao kahan ho gaya huun
kinare nikal aae hain mere andar
ba-zahir to main be-karan ho gaya huun
kisi kaam se shadman hote hote
kisi baat se bad-guman ho gaya huun
kisi ke liye vaqia huun yahan par
kisi ke liye dastan ho gaya huun
main bahar to mahfuz tha har tarah se
ghar aaya huun aur be-aman ho gaya huun
jo padne lagi thi bahut meri qimat
huun sharminda aur raegan ho gaya huun
‘zafar’ kaam luun ab isharon se kab tak
zaban tod kar be-zaban ho gaya huun
Leave a Reply