Faisle Ki Ghadi

Shahryar

barishen phir zaminon se naraz hain

aur samundar sabhi khushk hain

khurduri sakht banjar zaminon men kya boiye aur kya katiye

aankh ki os ke chand qatron se kya in zaminon ko sairab kar paoge

gandum o jau ke khoshon ki khushbu tumhara muqaddar nahin

asmanon se tum ko raqabat rahi

aur zaminon se tum be-taalluq rahe

riidh ki ek haddi pe tum ko bahut naaz tha

ye guman bhi na tha

ek din be-lahu ye bhi ho jaegi

faisle ki ghadi aa gai kuchh karo

titliyon ke sunahre hare surkh niile paron ke liye

aankh ki os ke chand qatron se banjar zamin ke kisi goshe men

phuul phir se ugane ki koshish karo