Shahryar
aahat jo sunai di hai hijr ki shab ki hai
ye raae akeli meri nahin hai sab ki hai
sunsan sadak sannate aur lambe saae
ye saari faza ai dil tere matlab ki hai
tiri diid se ankhen ji bhar ke sairab huiin
kis roz hua tha aisa baat ye kab ki hai
tujhe bhuul gaya kabhi yaad nahin karta tujh ko
jo baat bahut pahle karni thi ab ki hai
mire suraj aa! mire jism pe apna saaya kar
badi tez hava hai sardi aaj ghazab ki hai
Leave a Reply