Saleem Kausar
vahan mahfil na sajai jahan khalvat nahin ki
us ko socha hi nahin jis se mohabbat nahin ki
ab ke bhi tere liye jaan se guzar jaenge ham
ham ne pahle bhi mohabbat men siyasat nahin ki
tum se kya vada-khilafi ki shikayat karte
tum ne to laut ke aane ki bhi zahmat nahin ki
dhadkanen siine se ankhon men simat aai thiin
vo bhi khamosh tha ham ne bhi vazahat nahin ki
raat ko raat hi is baar kaha hai ham ne
ham ne is baar bhi tauhin-e-adalat nahin ki
gard-e-aina hatai hai ki sachchai khule
varna tum jante ho ham ne baghavat nahin ki
bas hamen ishq ki ashufta-sari khinchti hai
rizq ke vaste ham ne kabhi hijrat nahin ki
aa zara dekh len duniya ko bhi kis haal men hai
kai din ho gae dushman ki ziyarat nahin ki
tum ne sab kuchh kiya insan ki izzat nahin ki
kya hua vaqt ne jo tum se riayat nahin ki
Leave a Reply