Qateel Shifai
laakh pardon men rahun bhed mire kholti hai
shairi sach bolti hai
main ne dekha hai ki jab miri zaban dolti hai
shairi sach bolti hai
tera israr ki chahat miri betab na ho
vaqif is gham se mira halqa-e-ahbab na ho
to mujhe zabt ke sahraon men kyuun rolti hai
shairi sach bolti hai
ye bhi kya baat ki chhup chhup ke tujhe pyaar karun
gar koi puchh hi baithe to main inkar karun
jab kisi baat ko duniya ki nazar taulti hai
shairi sach bolti hai
main ne is fikr men katen kai raten kai din
mire sheron men tira naam na aae lekin
jab tiri saans miri saans men ras gholti hai
shairi sach bolti hai
tere jalvon ka hai par tiri miri ek ek ghazal
to mire jism ka saaya hai to katra ke na chal
parda-dari to khud apna hi bharam kholti hai
shairi sach bolti hai
Leave a Reply