diwali

Qateel Shifai

dar-o-divar par chhai hai udasi gham ki

mahv-e-hairat hai khushi dida-e-hairan ki tarah

koi jhonka koi aahat koi avaz nahin

raat viran hai kisi shahr-e-khamoshan ki tarah

din dhale dekh liya tha koi udta badal

kunmunati hai faza mausam-e-baran ki tarah

duur pardes ki rahon men bhatakte raahi

dil men phir yaad tiri aai hai mehman ki tarah

vo sar-e-sham dar-o-bam pe jalte dipak

kya miri tarah tujhe yaad nahin aate hain

raushni men vo nahae hue ujle manzar

kya nigahon men tiri aaj bhi lahrate hain

kya vo biite hue pur-nur chahakte lamhe

aaj bhi dil men tire giit koi gaate hain

kya tire khvab gham-e-hal ke virane men

ab bhi maazi ka fasana koi dohrate hain

vo ujale jo tiri tarah mujhe bhuul gae

duur se ab miri fariyad nahin sun sakte

dil ke taron ko bahut jama kiya hai main ne

vo magar naghma-e-ehsas nahin ban sakte

miri avaz ko jazbat ki divar ke paar

sun to sakte hain magar sar ko nahin dhun sakte

main jo rouun bhi to ye vaqt ke andhe sathi

kisi bikhre hue moti ko nahin chun sakte

dip-mala ki ye bechain bilakti hui raat

us ke daman men mire ashk-e-ravan palte hain

ham-safar koi nahin hai miri tanhai ka

chand saae hain jo hamrah mire chalte hain

dabdabai hui ankhon men hai savan ki jhadi

aur dil men mire yadon ke shajar palte hain

dekh main ne bhi manai hai yahan divali

miri palkon pe bhi ashkon ke diye julte hain