Aaj Aur Kal

Qateel Shifai

jab chhalakte hain zar-o-sim ke gaate hue jaam

ek zahrab sa mahaul men ghul jaata hai

kaanp uthta hai tahi-dast javanon ka ghurur

husn jab resham-o-kam-khvab men tal jaata hai

main ne dekha hai ki aflas ke sahraon men

qafile azmat-e-ehsas ke ruk jaate hain

bekasi garm nigahon ko jhulas deti hai

dil kisi shoala-e-zartab se phuk jaate hain

jin usulon se ibarat hai mohabbat ki asaas

un usulon ko yahan tod diya jaata hai

apni sahmi hui manzil ke tahaffuz ke liye

rahguzaron men dhuan chhod diya jaata hai

main ne jo raaz zamane se chhupana chaha!

tu ne afaq pe us raaz ka dar khol diya

meri banhon ne jo dekhe the sunahre sapne

tu ne sone ki tarazu men unhen tol diya

aaj aflas ne khaai hai zar-o-sim se maat

is men lekin tire chillon ka koi dosh nahin

ye taghayyur usi mahaul ka parvarda hai

apni be-rang tabahi ka jise hosh nahin

rahguzaron ke dhundalke to zara chhat jaaen

apne talvon se ye kante bhi nikal jaenge

aaj aur kal ki masafat ko zara tai kar len

vaqt ke saath irade bhi badal jaenge