Qateel Shifai
halat se khauf kha raha huun
shishe ke mahal bana raha huun
siine men mire hai mom ka dil
suraj se badan chhupa raha huun
mahrum-e-nazar hai jo zamana
aina use dikha raha huun
ahbab ko de raha huun dhoka
chehre pe khushi saja raha huun
dariya-e-furat hai ye duniya
pyasa hi palat ke ja raha huun
hai shahr men qaht pattharon ka
jazbat ke zakhm kha raha huun
mumkin hai javab de udasi
dar apna hi khatkhata raha huun
aaya na ‘qatil’ dost koi
sayon ko gale laga raha huun
Leave a Reply