Pirzada Qasim
dil agar kuchh maang lene ki ijazat mangta
ye mohabbat-zad tajdid-e-mohabbat mangta
vaqt khud na-paedari ke liye mashhur hai
aise be-taufiq se main khaak shohrat mangta
main ne sahra se tahayyur-khez hairat maang li
khaak ho jaata agar tahzib-e-vahshat mangta
dil ko khush aai nahin ye daulat-e-asudgi
aur kuchh mil jaati to ye kuchh aur zahmat mangta
hain khudavandan-e-duniya ham tahi-daston se hech
dil ko hasrat thi to ham jaison se khilat mangta
ho gaya hota giran-goshon se gar maghlub main
kyuun sukhan aghaz karta kyuun samaat mangta
kya taajjub tha ki is sauda-gari ke daur men
khvab bhi taabir ho jaane ki qimat mangta
Leave a Reply