Parveen Shakir
ashk aankh men phir atak raha hai
kankar sa koi khatak raha hai
main us ke khayal se gurezan
vo meri sada jhatak raha hai
tahrir usi ki hai magar dil
khat padhte hue atak raha hai
hain phone pe kis ke saath baten
aur zehn kahan bhatak raha hai
sadiyon se safar men hai samundar
sahil pe thakan tapak raha hai
ik chand salib-e-shakh-e-gul par
baali ki tarah latak raha hai
Leave a Reply