Parveen Shakir
apni rusvai tire naam ka charcha dekhun
ik zara sher kahun aur main kya kya dekhun
niind aa jaae to kya mahfilen barpa dekhun
aankh khul jaae to tanhai ka sahra dekhun
shaam bhi ho gai dhundla gaiin ankhen bhi miri
bhulne vaale main kab tak tira rasta dekhun
ek ik kar ke mujhe chhod gaiin sab sakhiyan
aaj main khud ko tiri yaad men tanha dekhun
kaash sandal se miri maang ujale aa kar
itne ghairon men vahi haath jo apna dekhun
tu mira kuchh nahin lagta hai magar jan-e-hayat
jaane kyuun tere liye dil ko dhdakna dekhun
band kar ke miri ankhen vo shararat se hanse
bujhe jaane ka main har roz tamasha dekhun
sab ziden us ki main puuri karun har baat sunun
ek bachche ki tarah se use hansta dekhun
mujh pe chha jaae vo barsat ki khushbu ki tarah
ang ang apna isi rut men mahakta dekhun
phuul ki tarah mire jism ka har lab khul jaae
pankhudi pankhudi un honton ka saaya dekhun
main ne jis lamhe ko puuja hai use bas ik baar
khvab ban kar tiri ankhon men utarta dekhun
tu miri tarah se yakta hai magar mere habib
ji men aata hai koi aur bhi tujh sa dekhun
tuut jaaen ki pighal jaaen mire kachche ghade
tujh ko main dekhun ki ye aag ka dariya dekhun
Leave a Reply