Obaidullah Aleem
bana gulab to kante chubha gaya ik shakhs
hua charagh to ghar hi jala gaya ik shakhs
tamam rang mire aur saare khvab mire
fasana the ki fasana bana gaya ik shakhs
main kis hava men uduun kis faza men lahraun
dukhon ke jaal har ik su bichha gaya ik shakhs
palat sakun hi na aage hi badh sakun jis par
mujhe ye kaun se raste laga gaya ik shakhs
mohabbaten bhi ajab us ki nafraten bhi kamal
miri hi tarah ka mujh men sama gaya ik shakhs
mohabbaton ne kisi ki bhula rakha tha use
mile vo zakhm ki phir yaad aa gaya ik shakhs
khula ye raaz ki aina-khana hai duniya
aur us men mujh ko tamasha bana gaya ik shakhs
Leave a Reply