Obaidullah Aleem
bahar ka dhan aata jaata asal khazana ghar men hai
har dhuup men jo mujhe saaya de vo sachcha saaya ghar men hai
patal ke dukh vo kya janen jo sath pe hain milne vaale
hain ek havala dost mire aur ek havala ghar men hai
miri umr ke ik ik lamhe ko main ne qaid kiya hai lafzon men
jo haara huun ya jiita huun vo sab sarmaya ghar men hai
tu nanha-munna ek diya main ek samundar andhiyara
tu jalte jalte bujhne laga aur phir bhi andhera ghar men hai
kya svang bhare roti ke liye izzat ke liye shohrat ke liye
suno shaam hui ab ghar ko chalo koi shakhs akela ghar men hai
ik hijr-zada babul piyari tire jagte bachchon se haari
ai shaer kis duniya men hai tu tiri tanha duniya ghar men hai
duniya men khapae saal kai akhir men khula ahval yahi
vo ghar ka ho ya bahar ka har dukh ka mudava ghar men hai
Leave a Reply