Nida Fazli
vo tavaif
kai mardon ko pahchanti hai
shayad isi liye
duniya ko ziyada janti hai
us ke kamre men
har mazhab ke bhagvan ki ek ek tasvir latki hai
ye tasviren
leaderon ki taqriron ki tarah numaishi nahin
us ka darvaza
raat gae tak
hindu
muslim
sikh
isai
har mazhab ke aadmi ke liye khula rahta hai
khuda jaane
us ke kamre ki si kushadgi
masjid aur mandir ke anganon men kab paida hogi
Leave a Reply