intizar

Nida Fazli

muddaten biit gaiin

tum nahin aaiin ab tak

roz suraj ke bayaban men

bhatakti hai hayat

chand ke ghaar men

thak-har ke so jaati hai raat

phuul kuchh der mahakta hai

bikhar jaata hai

har nasha

lahr banane men utar jaata hai

vaqt!

be-chehra havaon sa guzar jaata hai

kisi avaz ke sabze men lahak jaisi tum

kisi khamosh tabassum men chamak jaisi tum

kisi chehre men mahakti hui ankhon jaisi

kahin abru kahin gesu kahin banhon jaisi

chand se

phuul talak

yuun to tumhin tum ho magar

tum koi chehra koi jism koi naam nahin

tum jahan bhi ho

adhuri ho haqiqat ki tarah

tum koi khvab nahin ho

jo mukammal hogi