Chhoti Si Hansi

Nida Fazli

suuni suuni thi faza

main ne yunhi

us ke balon men gundhi khamoshiyon ko chhu liya

vo mudi

thoda hansi

main bhi hansa

phir hamare saath

nadiyan vadiyan

kohsar badal

phuul konpal

shahr jangal

sab ke sab hansne lage

ik mohalle men

kisi ghar ke

kisi kone ki

chhoti si hansi ne

duur tak phaili hui duniya ko

raushan kar diya hai

zindagi men

zindagi ka rang phir se bhar diya hai