Nasir Kazmi
kisi kali ne bhi dekha na aankh bhar ke mujhe
guzar gai jaras-e-gul udaas kar ke mujhe
main so raha tha kisi yaad ke shabistan men
jaga ke chhod gae qafile sahar ke mujhe
main ro raha tha muqaddar ki sakht rahon men
uda ke le gae jaadu tiri nazar ke mujhe
main tere dard ki tughyaniyon men duub gaya
pukarte rahe taare ubhar ubhar ke mujhe
tire firaq ki raten kabhi na bhulengi
maze mile unhin raton men umr bhar ke mujhe
zara si der thaharne de ai gham-e-duniya
bula raha hai koi baam se utar ke mujhe
phir aaj aai thi ik mauja-e-hava-e-tarab
suna gai hai fasane idhar udhar ke mujhe
Leave a Reply