Ahmad Faraz
ab aur kya kisi se marasim badhaen ham
ye bhi bahut hai tujh ko agar bhuul jaaen ham
sahra-e-zindagi men koi dusra na tha
sunte rahe hain aap hi apni sadaen ham
is zindagi men itni faraghat kise nasib
itna na yaad aa ki tujhe bhuul jaaen ham
tu itni dil-zada to na thi ai shab-e-firaq
aa tere raste men sitare lutaen ham
vo log ab kahan hain jo kahte the kal ‘faraz’
he he khuda-na-karda tujhe bhi rulaen ham
Leave a Reply