Muneer Niyazi
imtihan ham ne diye is dar-e-fani men bahut
ranj khinche ham ne apni la-makani men bahut
vo nahin us sa to hai khvab-e-bahar-e-javedan
asl ki khushbu udi hai us ke saani men bahut
raat din ke aane jaane men ye sona jagna
fikr valon ko pate hain is nishani men bahut
koyalen kukin bahut divar-e-gulshan ki taraf
chand damka hauz ke shaffaf paani men bahut
us ko kya yaden thiin kya aur kis jagah par rah gaiin
tez hai dariya-e-dil apni ravani men bahut
aaj us mahfil men tujh ko bolte dekha ‘munir’
to ki jo mashhur tha yuun be-zabani men bahut
Leave a Reply