Meer Taqi Meer
ab zoaf se dhahta hai betabi shitabi ki
us dil ke tadapne ne kya khana-kharabi ki
un daras-gahon men vo aaya na nazar ham ko
kya naqal karun khubi us chehra kitabi ki
bhunte hain dil ik janib sakte hain jigar yaksu
hai majlis-e-mushtaqan dukan kababi ki
talkh us lab-e-mai-gun se sab sunte hain kis khatir
tah-dar nahin hoti guftar sharabi ki
yak bu kushi bulbul hai maujib-e-sad-masti
pur-zor hai kya daaru ghunche ki gulabi ki
ab soz-e-mohabbat se saare jo phaphole hain
hai shakl mire dil ki sab shisha hababi ki
nash-murda mire munh se yaan harf nahin nikla
jo baat ki main ne ki so ‘mir’ hisabi ki
Leave a Reply