Meer Taqi Meer
ab jo ik hasrat-e-javani hai
umr-e-rafta ki ye nishani hai
rashk-e-yusuf hai aah vaqt-e-aziz
umr ik bar-e-karvani hai
girya har vaqt ka nahin be-hech
dil men koi gham-e-nihani hai
ham qafas-zad qaidi hain varna
ta chaman ek par-fishani hai
us ki shamshir tez hai hamdam
mar rahenge jo zindagani hai
gham-o-ranj-o-alam niko yaan se
sab tumhari hi mehrbani hai
khaak thi maujzan jahan men aur
ham ko dhoka ye tha ki paani hai
yaan hue ‘mir’ tum barabar khaak
vaan vahi naaz o sargirani hai
Leave a Reply