Adil Mansuri
saans ki aanch zara tez karo
kanch ka jism pighal jaane do
laam khali hai use mat chhedo
nuun ke pet men nuqta dekho
raat ke parde ulatte jaao
chand ka jism barahna bhi ho
sar uthao na kanar-e-dariya
mauj ko sar se guzar jaane do
khud-ba-khud shakh lachak jaegi
phal se bharpur to ho lene do
aankh khulte hi ye avaz aai
chor ghus aaya hai ghar men pakdo
ungliyan chatte rah jaoge
tum kabhi apna lahu chakh dekho
maut sadkon pe phira karti hai
ghar se niklo to sambhal kar niklo
kaun ab sher kahe nazm likhe
shahr hi chhod gai jab zebo
tum ko daava hai sukhan-fahmi ka
jaao ‘ghalib’ ke taraf-dar bano
kal vo ‘adil’ se ye farmate the
shaeri chhod ke shadi kar lo
Leave a Reply