Jaun Eliya
be-dili kya yunhi din guzar jaenge
sirf zinda rahe ham to mar jaenge
raqs hai rang par rang ham-raqs hain
sab bichhad jaenge sab bikhar jaenge
ye kharabatiyan-e-khirad-bakhta
subh hote hi sab kaam par jaenge
kitni dilkash ho tum kitna dil-ju huun main
kya sitam hai ki ham log mar jaenge
hai ghanimat ki asrar-e-hasti se ham
be-khabar aae hain be-khabar jaenge
Leave a Reply