Adil Mansuri
jalne lage khala men havaon ke naqsh-e-pa
suraj ka haath shaam ki gardan pe ja pada
chhat par pighal ke jam gai khvabon ki chandni
kamre ka dard hanpte sayon ko kha gaya
bistar men ek chand tarasha tha lams ne
us ne utha ke chaae ke cup men dubo diya
har aankh men thi tutte lamhon ki tishnagi
har jism pe tha vaqt ka saaya pada hua
dekha tha sab ne dubne vaale ko duur duur
paani ki ungliyon ne kinare ko chhu liya
aaegi raat munh pe siyahi male hue
rakh dega din bhi haath men kaghaz phata hua
Leave a Reply