Hasrat Mohani
pairav-e-maslak-e-taslim-o-raza hote hain
ham teri rah-e-mohabbat men fana hote hain
sharm kar sharm ki ai jazba-e-tasir-e-vafa
tere hathon vo pashiman-e-jafa hote hain
chhedti hai mujhe bebaki-e-khvahish kya kya
jab kabhi haath vo paband-e-hina hote hain
na asar aah men kuchh hai na dua men tasir
tiir ham jitne chalate hain khata hote hain
ahl-e-dil sunte hain ik saz-e-mohabbat ki nava
ham tiri yaad men jab naghma-sara hote hain
lazzat-e-dard na kyuun ahl-e-havas par ho haram
ki vo kam-bakht talabgar-e-dava hote hain
kishvar-e-ishq men duniya se nirala hai rivaj
kaam jo ban na paden yaan vo rava hote hain
hech ham samjhe do aalam ko to hairat kya hai
rutbe ushshaq ke is se bhi siva hote hain
jism hota hai juda jaan se goya ‘hasrat’
asman un se chhudata hai juda hote hain
Leave a Reply