Adil Mansuri
ganthi hai us ne dosti ik pesh-imam se
‘adil’ utha lo haath dua-o-salam se
paani ne rasta na diya jan-bujh kar
ghote lagae phir bhi rahe tishna-kam se
main us gali se sar ko jhukae guzar gaya
chilghoze phenkti rahi vo mujh pe baam se
vo kaun tha jo din ke ujale men kho gaya
ye chand kis ko dhundne nikla hai shaam se
kone men badshah pada unghta raha
table pe raat kat gai begam ghulam se
nashsha sa dolta hai tire ang ang par
jaise abhi bhigo ke nikala ho jaam se
Leave a Reply