Firaq Gorakhpuri
ho ke sar-ta-ba-qadam alam-e-asrar chala
jo chala mai-kada-e-ishq se sarshar chala
hamrah-e-husn ik amboh-e-kharidar chala
saath is jins ke bazar ka bazar chala
na hua rah-e-mohabbat men koi ohda-bara
jo subuk-dosh hua vo bhi giran-bar chala
un ka jo haal ki pahle tha vahi haal raha
tere gham-kushton se iqrar na inkar chala
asman ho ki qayamat ho ki ho tir-e-qaza
chaal us fitna-e-dauran se har ik baar chala
zauq-e-nazzara usi ka hai jahan men tujh ko
dekh kar bhi jo liye hasrat-e-didar chala
husn-e-kafir se kisi ki na gai pesh ‘firaq’
shikva yaron ka na shukrana-e-aghyar chala
Leave a Reply