Firaq Gorakhpuri
har uqda-e-tadir jahan khol rahi hai
haan dhyan se sunna ye sadi bol rahi hai
angdaiyan leti hai tamanna tiri dil men
shishe men pari naaz ke par taul rahi hai
rah rah ke khanak jaati hai saaqi ye shab-e-mah
ik jaam pila khunki-e-shab bol rahi hai
dil tang hai shab ko kafan-e-nur pinha ke
vo subh jo ghunchon ki girah khol rahi hai
shabnam ki damak hai ki shab-e-mah ki devi
moti sar-e-gulzar-e-jahan rol rahi hai
rakhti hai mashiyyat had-e-parvaz jahan bhi
insan ki himmat vahin par tol rahi hai
pahlu men shab-e-tar ke hai kaun si duniya
jis ke liye aghosh sahar khol rahi hai
har aan vo rag rag men chatakti hui kaliyan
us shokh ki ik ek ada bol rahi hai
Leave a Reply