Faiz Ahmad Faiz
gham-ba-dil shukr-ba-lab mast o ghazal-khvan chaliye
jab tilak saath tire umr-e-gurezan chaliye
rahmat-e-haq se jo is samt kabhi raah mile
su-e-jannat bhi ba-rah-e-rah-e-janan chaliye
nazr mange jo gulistan se khuda-vand-e-jahan
saghar-e-mai men liye khun-e-baharan chaliye
jab satane lage be-rangi-e-divar-e-jahan
naqsh karne koi tasvir-e-hasinan chaliye
kuchh bhi ho aina-e-dil ko musaffa rakhiye
jo bhi guzre masal-e-khusrav-e-dauran chaliye
imtihan jab bhi ho manzur jigar-daron ka
mahfil-e-yar men ham-rah-e-raqiban chaliye
Leave a Reply